திருச்சி மாவட்டம், முசிறி வட்டம் மேட்டுப்பாளையத்தைச் சேர்ந்தவர் மாதா ஜெயகுமார் (34). இவர், கேரள மாநிலம் கோழிக்கோடு மாவட்டம் வடகரை எடோடி பகுதியில் உள்ள தேசிய வங்கியின் கிளை மேலாளராக கடந்த ஓராண்டாகப் பணியாற்றி வந்தார். இந்நிலையில், அவர் கேரள மாநிலம் எர்ணாகுளத்தில் உள்ள வங்கியின் மற்றொரு கிளைக்கு இடம்மாற்றம் செய்யப்பட்டார். இந்நிலையில், எடோடி வங்கியில் புதிய மேலாளராகப் பொறுப்பேற்றவர், அடகு நகைகள் குறித்து தணிக்கை செய்துள்ளார். அப்போது, வங்கியில் வாடிக்கையாளர்கள் வைத்த கிலோ கணக்கிலான தங்க நகைகளுக்குப் பதில் போலியான நகைகள் இருப்பது தெரியவந்தது.
தொடர்ந்து, வங்கி அதிகாரிகள் நடத்திய விசாரணையில் ரூ. 17 கோடியே 50 லட்சம் மதிப்பிலான 26 கிலோ 800 கிராம் நகைகள் போலியாக இருப்பது தெரியவந்தது. மேலும், வங்கி மேலாளராக இருந்த மாதா ஜெயகுமார், எர்ணாகுளம் கிளையில் பொறுப்பு ஏற்காமல், தலைமறைவானதும் தெரியவந்தது. வங்கித் தரப்பில் அளிக்கப்பட்ட புகாரின் அடிப்படையில் கேரள வடகரை போலீஸார் மாதா ஜெயகுமாரை தேடி வந்தனர். இந்நிலையில், அவர் தெலங்கானாவில் வைத்து கடந்த இரண்டு நாள்களுக்கு முன்பு கைது செய்யப்பட்டார்.
போலீஸார் அவரிடம் நடத்திய விசாரணையில், திருப்பூரில் உள்ள தனியார் வங்கியில் அந்த நகைகள் சிலவற்றை ஜெயக்குமாரின் நண்பரான, திருப்பூர் சந்திராபுரம் கேஎன்பி காலனி ராஜீவ்காந்தி நகரைச் சேர்ந்த கார்த்திக் (29) என்பவரிடம் கொடுத்து அடமானம் வைத்து பணம் பெற்றதும் தெரியவந்தது. இதையடுத்து, கேரள மாநில போலீஸார் மாதா ஜெயகுமாரை அழைத்துக் கொண்டு திருப்பூர் வந்தனர். திருப்பூர் புஷ்பா திரையரங்கம் மற்றும் காங்கயம் சாலைகளில் உள்ள ஒரே தனியார் வங்கியின் இரு வேறு கிளைகளில் போலீஸார் மற்றும் வங்கி அதிகாரிகள் ஆய்வு செய்தனர்.
இதையடுத்து புஷ்பா திரையரங்கம் கிளையில் 4 கிலோ 600 கிராம் நகை, காங்கேயம் சாலை கிளையில் 900 கிராம் தங்கம் என 5 கிலோ 300 கிராம் அடகு வைக்கப்பட்ட நகைகள் பறிமுதல் செய்யப்பட்டது. இந்த மோசடி தொடர்பாக தலைமறைவான கார்த்திக்கை தேடி வருவதாகவும், இதில் எத்தனை பேர் ஈடுபட்டுள்ளனர் என்ற விவரங்கள் தொடர்பாக தொடர்ந்து விசாரித்தும் வருகின்றனர். தொடர்ந்து மாதா ஜெயக்குமாரிடம், அவர் எங்கெங்கு வைத்து பணத்தை பெற்றுள்ளார் என்பது தொடர்பாகவும் தொடர்ந்து விசாரிக்கின்றனர்.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/crf99e88
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/crf99e88