இந்தியன் -2 படத்தில் நவரச நாயகன் நடிகர் கார்த்திக் முக்கிய கதாபாத்திரத்தில் நடிக்க உள்ளதாக தகவல் வெளியாகி உள்ளது.
இயக்குநர் ஷங்கர் இயக்கத்தில், கமல்ஹாசன் தந்தை – மகன் என இரட்டை கதாபாத்திரத்தில் நடித்து, கடந்த 1996-ம் ஆண்டு வெளியான ‘இந்தியன்’ படம் ரசிகர்களிடையே பெரும் வரவேற்பைப் பெற்றது. அரசுத் துறையில் அதிகாரிகள் செய்யும் ஊழலை களையும்விதமாக இந்தப் படம் எடுக்கப்பட்டிருந்தது. இதனைத் தொடர்ந்து இந்தப் படத்தின் இரண்டாம் பாகத்தை எடுக்க, இயக்குநர் ஷங்கர் திட்டமிட்டு கடந்த 2019-ம் ஆண்டு முதல் படப்பிடிப்பும் நடத்தப்பட்டது. இதில் கமல்ஹாசனுக்கு ஜோடியாக காஜல் அகர்வால் நடித்துவந்தார். லைகா புரொடெக்ஷன்ஸ் பெரும் பொருட்செலவில் இந்தப் படத்தை தயாரிக்கிறது.
படத்தின் படப்பிடிப்புகள் விறுவிறுப்பாக நடைபெற்று வந்த நிலையில், படப்பிடிப்பில் ஏற்பட்ட கிரேன் விபத்து, கொரோனா ஊரடங்கு, இயக்குநர் ஷங்கருக்கும், தயாரிப்பு நிறுவனம் லைகாவிற்கும் இடையேயான கருத்து வேறுபாடு உயர்நீதிமன்றம் வரை சென்றது ஆகிய பிரச்சினைகளால் ‘இந்தியன் 2’ படத்தின் படப்பிடிப்பு அப்படியே நின்று போனது. இந்நிலையில் பல மாதங்கள் நிறுத்தப்பட்டிருந்த இந்தியன் -2 படப்பிடிப்பு தற்போது மீண்டும் தொடங்கவுள்ளதால் கமல் ரசிகர்கள் உற்சாகமடைந்துள்ளனர். இந்த நிலையில், இப்படத்தில் கார்த்திக் முக்கிய கதாபாத்திரத்தில் நடிக்க உள்ளதாக தகவல் வெளியாகி உள்ளதால் படத்திற்கு எதிர்ப்பார்ப்பு அதிகரித்துள்ளது.
முன்னதாக இந்த படத்திலிருந்து நடிகை காஜல் அகர்வால் விலகி விட்டதாகவும், மேலும் அவருக்குப் பதில் பிரபல பாலிவுட் நடிகை தீபிகா படுகோனே நடிக்க உள்ளதாகவும் சமூக வலைத்தளங்களில் வதந்திகள் பரவின. இந்நிலையில் தனது இன்ஸ்டாகிராம் பக்கத்தில் ரசிகர்களுடன் நேரலையில் உரையாடிய போது, நடிகை காஜல் அகர்வால், வருகிற செப்டம்பர் 13-ம் தேதி ‘இந்தியன் 2’ படத்தின் படப்பிடிப்பு மீண்டும் தொடங்கும் என அறிவித்து சர்ச்சைக்கு முற்றுப்புள்ளி வைத்தது குறிப்பிடத்தக்கது.
