இந்திய வம்சாவளியைச் சேர்ந்தவர், தொழிலதிபர் பங்கஜ் ஓஸ்வால். தற்போது சுவிட்சர்லாந்தில் வசித்து வரும் இவர் தன் மகள் வசுந்தரா ஓய்வால் மீது பொய் குற்றச்சாட்டு சுமத்தப்பட்டு உகாண்டா நாட்டில் சிறைபிடிக்கப்பட்டுள்ளதாகவும், அவரை மீட்டுத் தர நடவடிக்கை எடுக்கும்படியும் ஐ.நா பணிக்குழுவிடம் கோரிக்கை விடுத்திருக்கிறார்.
இந்திய வம்சாவளி தொழிலதிபர் அபய் குமார் ஓஸ்வால். இவரது, ‘ஓஸ்வால் குரூப் குளோபல்’ நிறுவனம் உலகம் முழுதும் பெட்ரோ கெமிக்கல்ஸ், ரியல் எஸ்டேட், உரம் மற்றும் சுரங்க தொழில்களில் ஈடுபட்டு வருகிறது. இவரது மகன்தான் பங்கஜ் ஓஸ்வால். இவர் ஓஸ்வால் ஆக்ரோ மில்ஸ் மற்றும் ஓஸ்வால் கிரீன்டெக் நிறுவனங்களை துவங்கி நடத்தி வருகிறார். மனைவி ராதிகாவுடன் ஐரோப்பிய நாடான சுவிட்சர்லாந்தில் கடந்த 10 ஆண்டுகளாக வசித்து வருகிறார்.
கோடிக் கணக்கில் சொத்துகள் இருக்கும் பங்கஜ் ஓஸ்வாலின் மகளான வசுந்தரா ஓஸ்வால் கிழக்கு ஆப்ரிக்க நாடான உகாண்டாவில் உள்ள, ‘பிஆர்ஓ இண்டஸ்ட்ரீஸ்’ என்ற நிறுவனத்தின் செயல் இயக்குநராக பொறுப்பு வகித்து வருகிறார். இந்நிலையில், உகாண்டா போலீசார் அவரை சட்டவிரோதமாக சிறைபிடித்து, கடந்த 1ம் தேதி முதல் காவலில் வைத்து உள்ளதாக பங்கஜ் ஓஸ்வால் குற்றம்சாட்டி இருக்கிறார். இவரது நிறுவனத்தில் பணியாற்றிய ஊழியர் ஒருவர், நகைகளை திருடியதுடன், 1.60 கோடி ரூபாய் வங்கி கடன் பெற்றதாகவும், அதை திருப்பிச் செலுத்தவில்லை என்றும் கூறப்படுகிறது.
இந்த கடன் தொகைக்கு ஓஸ்வால் குடும்பத்தினர் உத்தரவாதம் அளித்துள்ளதை அடுத்து, அவர்களிடம் பணத்தை திருப்பிச் செலுத்தும்படி வங்கி அழுத்தம் கொடுத்திருக்கிறது. அவர்கள் பணத்தை செலுத்த மறுத்ததை அடுத்து, வசுந்தரா ஓஸ்வால் மீது கடத்தல் மற்றும் கொலை முயற்சி வழக்குகள் பதிவு செய்து, அவரை சட்டவிரோதமாக போலீசார் சிறைபிடித்துள்ளதாக ஓஸ்வால் குடும்பத்தினர் குற்றம்சாட்டி இருகின்றனர். சட்ட உதவியை நாடவும் அனுமதி மறுக்கப்படுவதாக பங்கஜ் தெரிவித்திருக்கிறார். இந்த விவகாரத்தில் மகளின் பாதுகாப்பை உறுதி செய்யும்படி, ஐ.நா., பணிக்குழுவிடம் கோரிக்கை விடுத்திருக்கிறார்.
யார் இந்த வசுந்தரா ஓஸ்வால்?
வசுந்தரா ஓஸ்வால், 1999 ஆம் ஆண்டு பிறந்த இவருக்கு தற்போது வயது 26. இவர் சுவிட்சர்லாந்து பல்கலைக்கழகத்தில் நிதித்துறையில் இளங்கலைப் பட்டம் பெற்றிருக்கிறார். முதலில் ஓஸ்வால் குழுமத்தின் ஆக்சிஸ் மினரல்ஸ் நிறுவனத்தின் செயல் இயக்குநராக வசுந்திரா பணியாற்றி வந்திருக்கிறார். தற்போது கிழக்கு ஆப்ரிக்க நாடான உகாண்டாவில் உள்ள, ‘பிஆர்ஓ இண்டஸ்ட்ரீஸ்’ என்ற நிறுவனத்தின் செயல் இயக்குநராக பொறுப்பு வகித்து வருகிறார். ஓய்வால் குழுமத்தில் முதலீடுகளை நிர்வகித்தல், நிதி நடவடிகைகளை மேற்பார்வை செய்தல், புதிய வணிக முயற்சிகளை மேற்கொள்ளுதல் போன்ற செயல்களில் ஈடுபட்டு வந்திருக்கிறார். இந்நிறுவனத்தின் பல திட்டங்களிலும் அவர் பங்காற்றி இருக்கிறார்.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://tinyurl.com/crf99e88
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/crf99e88