அ.தி.மு.க முன்னாள் அமைச்சரான எம்.ஆர்.விஜயபாஸ்கர், அ.தி.மு.க கரூர் மாவட்டச் செயலாளராக இருக்கிறார். இவர்மீது, கடந்த ஜூலை 14-ம் தேதி ரூ.100 கோடி நில மோசடி வழக்கு தொடர்பாக மேல கரூர் சார்பதிவாளர் முகமது அப்துல் காதர் கரூர் நகர காவல் நிலையத்தில் புகார் ஒன்றை அளித்தார். அதனடிப்படையில் செல்வராஜ், மாரப்பன், பிரவீன் உள்ளிட்ட 7 பேர்மீது 8 பிரிவுகளில் வழக்கு பதிவுசெய்யப்பட்டது. இந்நிலையில், காட்டூர் பகுதியைச் சேர்ந்த தொழிலதிபர் பிரகாஷ் அளித்த புகாரின் அடிப்படையில், வாங்கல் காவல் நிலையத்தில் எம்.ஆர்.விஜயபாஸ்கர், அவரது சகோதரர் சேகர் ஆகியோர் மீது வழக்குப்பதிவு செய்யப்பட்டது. ஆனால், எம்.ஆர்.விஜயபாஸ்கர், அவரத சகோதரர், பிரவீன் உள்ளிட்டவர்கள் தலைமறைவானார்கள். இதற்கிடையில், சி.பி.சி.ஐ.டி-க்கு இந்த வழக்கு மாற்றப்பட, 14 தனிப்படைகள் அமைக்கப்பட்டு அவர்களை தேடி வந்தனர்.
இந்நிலையில், அவர் கரூர் நீதிமன்றத்தில் தாக்கல் செய்த மூன்றுக்கும் மேற்பட்ட முன்ஜாமீன் மனுக்கள் தள்ளுப்படி செய்யப்பட்டது. இதனால், சென்னை உயர் நீதிமன்ற மதுரைக் கிளையில் முன்ஜாமீன் கேட்டு மனுத்தாக்கல் செய்தது எம்.ஆர்.விஜயபாஸ்கர் தரப்பு. இந்த நிலையில், சார்பதிவாளர் அளித்த புகார் அடிப்படையில் சி.பி.சி.ஐ.டி தனிப்படை போலீஸார் 34 நாள்கள் தலைமறைவாக இருந்த, அ.தி.மு.க கரூர் மாவட்டச் செயலாளரும், முன்னாள் போக்குவரத்துத்துறை அமைச்சருமான எம்.ஆர்.விஜயபாஸ்கர் மற்றும் பிரவீன் உள்ளிட்ட இருவரையும், கேரளாவில் உள்ள தங்கும் விடுதியில் வைத்து கைதுசெய்து கரூர் குற்றவியல் நடுவர் நீதித்துறை எண் 1-ல் ஆஜர்படுத்தினர். நீதிபதி பரத்குமார் வரும் ஜூலை 31-ம் தேதி வரை திருச்சி மத்திய சிறையில் அடைக்க உத்தரவிட்டார்.
இந்நிலையில், வாங்கல் காவல் நிலையத்தில் தொழிலதிபர் பிரகாஷ் அளித்த புகார் அடிப்படையில், கடந்த ஜூன் 22-ம் தேதி பதிவுசெய்த வழக்கில் எம்.ஆர்.விஜயபாஸ்கர் மற்றும் அவருடைய சகோதரர் சேகர் ஆகியோர் மீது 6 பிரிவுகளில் வழக்கு பதிவு செய்தனர். இந்த வழக்கு தொடர்பாக இன்று கரூர் குற்றவியல் நீதித்துறை நடுவர் எண் 2-ல் எம்.ஆர்.விஜயபாஸ்கர் நீதிபதி மகேஷ் முன்பு ஆஜர்படுத்தப்பட்டார். அந்த வழக்கில் எம்.ஆர்.விஜயபாஸ்கரை நீதிபதி ஜூலை 31-ம் தேதி வரை நீதிமன்ற காவலில் வைக்க உத்தரவிட்டார். இதனையடுத்து, திருச்சி மத்திய சிறைக்கு எம்.ஆர்.விஜயபாஸ்கர் அழைத்துச் செல்லப்பட்டார். இதற்கிடையில், எம்.ஆர்.விஜயபாஸ்கர் கரூர் நீதிமன்றத்தில் ஆஜர்படுத்தப்பட உள்ளதாக அறிந்து நூற்றுக்கணக்கான அ.தி.மு.க-வினர் திரண்டதால் அங்கு கூடுதல் போலீஸ் பாதுகாப்பு போடப்பட்டது.
இதேபோல், சி.பி.சி.ஐ.டி விசாரணையில் வில்லிவாக்கம் காவல் ஆய்வாளராக பணியாற்றிய ஆய்வாளர் பிரிதிவிராஜ், எம்.ஆர்.விஜயபாஸ்கருக்கு உதவியதாக கைது செய்யப்பட்டு சேலம் மத்திய சிறையில் அடைக்கப்பட்டுள்ளார். இதற்கிடையில், நேற்று சி.பி.சி.ஐ.டி வழக்கு தொடர்பாக முன்ஜாமீன் கேட்டு தாக்கல் செய்த மனுமீதான விசாரணை இரு தரப்பு வாதங்களும் முன்வைக்கப்பட்டு ஜூலை 22-ம் தேதிக்கு ஒத்தி வைக்கப்பட்டுள்ளது குறிப்பிடத்தக்கது. அ.தி.மு.க முன்னாள் அமைச்சர் எம்.ஆர்.விஜயபாஸ்கர் சார்பதிவாளர் மற்றும் தொழிலதிபர் பிரகாஷ் ஆகியோர் கொடுத்த வழக்குகளில் அடுத்தடுத்து கைதுசெய்யப்பட்டுள்ளது, கரூர் மாவட்டத்தில் பரபரப்பை ஏற்படுத்தியிருக்கிறது.