“இந்தியாவையே மாற்றப்போகிறோம் என்றார் மோடி… ஆனால், பெயரைத்தான் மாற்ற முடிந்திருக்கிறது” – ஸ்டாலின்

செப்டம்பர் 18 முதல் 22-ம் தேதி வரை நாடாளுமன்ற சிறப்புக் கூட்டத்தொடர் நடைபெறவிருக்கிறது. இந்தக் கூட்டத்தொடரில் பொது சிவில் சட்டம், `ஒரே நாடு ஒரே தேர்தல்’, பெண்களுக்கான இட ஒதுக்கீடு போன்றவை விவாதிக்கப்பட்டு அமல்படுத்தப்போவதாகப் பேச்சுகள் வந்துகொண்டிருக்கின்றன. இவ்வாறிருக்க, டெல்லியில் இந்த வார இறுதியில் நடைபெறவிருக்கும் `ஜி20′ கூட்டத்தொடரில் கலந்துகொள்ளவிருக்கும் நாடுகளின் தலைவர்களுக்கு, இரவு விருந்து தொடர்பாக இந்திய குடியரசுத் தலைவர் திரௌபதி முர்மு அனுப்பியிருக்கும் கடிதத்தில், அவரை `பாரத குடியரசுத் தலைவர்’ என்று குறிப்பிட்டிருப்பது பெரும் விவாதப்பொருளாக மாறியிருக்கிறது.

இந்து சனாதன சித்தாந்த கோட்பாட்டை உள்வாங்கிக்கொண்ட ஆர்.எஸ்.எஸ் அமைப்பு, இந்தியாவை பாரதம், ராஷ்டிரம் என்று கூறிவந்த நிலையில், தற்போது மத்திய பா.ஜ.க அரசு இந்தியாவைப் பாரதம் எனக் குறிப்பிட்டிருப்பது சர்ச்சையை ஏற்படுத்தியிருக்கிறது. பா.ஜ.க-வின் இந்தச் செயலுக்கு எதிர்க்கட்சிகள் தரப்பிலிருந்து இதற்கு கடுமையான எதிர்ப்புகள் வந்தவண்ணம் இருக்கின்றன. வரும் நாடாளுமன்ற சிறப்புக் கூட்டத்தொடரில், இந்தியாவின் பெயர் `பாரதம்’ என்று பா.ஜ.க அரசு அதிகாரபூர்வமாக மாற்றப்போவதாகக் கூறப்படுகிறது.

இந்த நிலையில், தமிழக முதல்வர் ஸ்டாலின் எதிர்க்கட்சிகளின் `இந்தியா’ (I.N.D.I.A) கூட்டணியைக் குறிப்பிட்டு, “தேர்தலில் `இந்தியா’ என்ற சொல்லே பா.ஜ.க-வை விரட்டும்” என்று பா.ஜ.க-வைச் சாடியிருக்கிறார். இது குறித்து அவர் தனது ட்விட்டர் எக்ஸ் பக்கத்தில், “பாசிச பா.ஜ.க ஆட்சியை வீழ்த்தும் கூட்டணிக்கு I.N.D.I.A என்று பெயர் சூட்டியதிலிருந்து, பா.ஜ.க-வுக்கு `இந்தியா’ என்ற சொல்லே கசந்துவருகிறது.

இந்தியாவை வளர்ச்சிமிகு இந்தியாவாக மாற்றப்போகிறோம் என்று சொல்லி ஆட்சிக்கு வந்த பிரதமர் நரேந்திர மோடியால், ஒன்பது ஆண்டுகளுக்குப் பிறகு `இந்தியா’ என்ற பெயரை மட்டும்தான் மாற்ற முடிந்திருக்கிறது. `அரண்டவர் கண்ணுக்கு இருண்டதெல்லாம் பேய்’ என்பதைப்போல, `இந்தியா’ என்ற சொல்லே பா.ஜ.க-வை மிரட்டுகிறது. தேர்தலில் `இந்தியா’ என்ற சொல்லே பா.ஜ.க-வை விரட்டும்” என்று பதிவிட்டிருக்கிறார்.

Junior Vikatan-ன் பிரத்யேக Whatsapp Group…

இணைவதற்கு இங்கே க்ளிக் செய்யவும்… https://bit.ly/3PaAEiY

வணக்கம்,

BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/3PaAEiY