இந்த ஆண்டின் இறுதி மாதத்தை நெருங்கிவிட்டோம். சில நடைமுறைகளுக்கும் இறுதி நாள்கள் நெருங்குகின்றன. அவை என்னென்ன என்பதை வரிசையாக பார்த்துவிடலாமா?
1. பான் – ஆதார் இணைப்பு: வரும் டிசம்பர் 30-ம் தேதிக்குள் பான் கார்டை ஆதார் அட்டையுடன் இணைத்துவிட வேண்டும். இல்லையென்றால், 2026-ம் ஆண்டு, ஜனவரி 1-ம் தேதி முதல் பான் கார்டு செல்லுபடியாகாமல் போய்விடும்.
2. தாமத ஐ.டி.ஆர் ஃபைலிங்: கடந்த செப்டம்பர் 16-ம் தேதிக்குள் வருமான வரிக் கணக்குத் தாக்கல் செய்யவில்லையா? பரவாயில்லை. 2024-25 நிதியாண்டிற்கான வருமான வரிக் கணக்குத் தாக்கலை ‘தாமத வருமான வரிக் கணக்குத் தாக்கலாக’ செய்யலாம். ஆனால், இந்தக் கணக்குத் தாக்கலுக்கு அபராதம் உண்டு மக்களே.
3. வருமான வரித் தணிக்கை செய்ய: தனிநபர்கள் மற்றும் நிறுவனங்கள் ‘வரித் தணிக்கை’ செய்வதற்கான தேதி இந்த ஆண்டு அக்டோபர் 31-ம் தேதியில் இருந்து டிசம்பர் 10-ம் தேதி என மாற்றப்பட்டுள்ளது. இதை விரைவில் முடிப்பது நல்லது.
இன்றும், நாளையும் உடனே செய்ய வேண்டியவை…
1. பென்சன்தாரர்கள் தொடர்ந்து பென்சன் பெற நாளைக்குள் (நவம்பர் 30) ‘உயிர்வாழ் சான்றிதழை‘ சமர்ப்பிக்க வேண்டும். ‘கடைசி தேதி ஆகிவிட்டதே’ என்கிற பதற்றம் வேண்டாம். இதை டிஜிட்டலிலேயே எளிதாக சமர்ப்பித்து கொள்ளலாம்.
2. தேசிய பென்சன் திட்டத்தில் (NPS) இருந்து ஒருங்கிணைந்த பென்சன் திட்டத்திற்கு (UPS) மாற நினைப்பவர்களுக்கு நாளையே கடைசி தேதி. உடனே இதற்கான வேலையை தொடங்குவது நல்லது.