ஆன்மிக நகரமான திருவண்ணாமலைக்கு தினந்தோறும் ஆந்திரா, தெலங்கானாவில் இருந்து ஆயிரக்கணக்கான பக்தர்கள் வந்துசெல்கின்றனர். வட இந்தியர்கள், வெளிநாட்டவர்களின் வருகை கணிசமாக இருந்தாலும், தெலுங்கு மொழி பேசக்கூடிய பக்தர்கள் தான் திருப்பதிக்கு அடுத்து திருவண்ணாமலைக்கு அதிகம் வருகின்றனர். இதனால், அருணாசலேஸ்வரர் திருக்கோயிலிலும் முடி காணிக்கை செலுத்துமிடம் தொடங்கி, பல இடங்களில் தெலுங்கு மொழியில் தகவல் பதாகைகள் வைக்கப்பட்டுள்ளன.
தமிழ்நாடு அரசின் இந்து சமய அறநிலையத்துறையே தெலுங்கு மொழியில் பதாகை வைத்திருக்கிறது. வியாபாரத் திட்டத்துடனும் அண்டை மாநிலத்தவர்கள் திருவண்ணாமலை நகரிலும், கிரிவலப் பாதையிலும் குழுமியிருக்கின்றனர். தங்கும் விடுதிகள், ஹோட்டல்கள் எனத் திரும்பிய பக்கமெல்லாமல், ஆங்கிலம், தெலுங்கு, இந்தி என மாற்று மொழிகளின் தகவல் பலகைகளே கண்களுக்கு புலப்படுகின்றன. ஆனால், அத்தி பூத்தாற்போல தமிழ் பெயர்ப் பலகைகளைத் தேடித்தான் பார்க்க வேண்டியிருக்கிறது.
இந்த நிலையில்தான் திருவண்ணாமலை மாவட்ட ஆட்சியர் தர்ப்பகராஜ் அதிரடியாக ஓர் உத்தரவை பிறப்பித்திருக்கிறார். இது தொடர்பாக, ஆட்சியர் தர்ப்பகராஜ் வெளியிட்டுள்ள செய்திக்குறிப்பில், “திருவண்ணாமலை மாவட்டத்தில் உள்ள பள்ளி, கல்லூரிகள், அனைத்து கடைகள், வணிக நிறுவனங்கள், உணவு நிறுவனங்கள் மற்றும் தொழிற்சாலைகளின் பெயர்ப் பலகைகளை தமிழில் வைக்க வேண்டும். மேலும், பெயர்ப் பலகையில் கடை அல்லது நிறுவனத்தின் பெயரினை பெரிய அளவிலான தமிழ் எழுத்துகளில் குறிப்பிட வேண்டும்.
ஆங்கிலம் மற்றும் பிற மொழிகள் தமிழ் எழுத்துகளை விட சிறிய அளவிலான எழுத்துகளில் இருக்க வேண்டும். மாவட்ட ஆட்சித்தலைவர் தலைமையிலான குழு மூலம் ஆய்வு மேற்கொள்ளப்படும். மே 15-க்குள் 100 சதவிகிதம் தமிழ் பெயர்ப் பலகை வைக்கப்பட்டுள்ளதா என்பதை உறுதி செய்ய நடவடிக்கை எடுக்கப்பட உள்ளது. மே 15 வரை கால அவகாசமும் அளிக்கப்படுகிறது. அதன் பிறகும் தமிழில் பெயர்ப் பலகை வைக்காத நிறுவனங்கள் மீது ஆய்வு செய்யப்பட்டு அபராதம் விதிக்கப்படும்’’ எனக் குறிப்பிட்டிருக்கிறார்.