கோவை: டிவி சத்தத்தால் வந்த பிரச்னை – இளைஞர் ஓட ஓட விரட்டி கொலை

கோவை கெம்பட்டிகாலனி பகுதியைச் சேர்ந்தவர் கோகுல் என்றழைக்கப்படும் கோகுலகிருஷ்ணன் (24). இவரின் கேங்குக்கும், அதே பகுதியில் உள்ள மற்றொரு கேங்குக்கும் முன்பகை இருந்துள்ளது. இதனால் அவர்களுக்கிடையே அவ்வபோது மோதல் போக்கு ஏற்பட்டு வந்தது.

இதையடுத்து பஞ்சாயத்தை தீர்க்கும் வகையில், இரண்டு தரப்பினரும், செல்வபுரம் அசோக்நகர் பகுதியில் சந்திக்க முடிவு செய்தனர். கோகுலகிருஷ்ணன் தன் நண்பர்களுடன் செல்ல, எதிர் தரப்பிலும் 5 இளைஞர்கள வந்துள்ளனர்.

அப்போது இரண்டு கேங்கும் மதுபோதையில் இருந்துள்ளனர். வாக்குவாதம் முற்றி மோதலாக வெடித்தது. எதிர் தரப்பினர் பயங்கர ஆயுதங்களுடன் கோகுலகிருஷ்ணனை தாக்கினர். இதில் இருந்து தப்பிக்க, கோகுலகிருஷ்ணன் மற்றும் அவரின் நண்பர்கள் தப்பி ஓட முயற்சித்துள்ளனர்.

நண்பர்கள் தப்பி செல்ல, கோகுலகிருஷ்ணனை ஓட ஓட சரமாரியாக வெட்டி கொலை செய்தனர்.இந்த சம்பவம் தொடர்பாக செல்வபுரம் போலீஸ் வழக்குப்பதிவு செய்து விசாரித்தனர்.

இதையடுத்து கொலை சம்பவத்தில் ஈடுபட்ட, ஜப்பான் என்றழைக்கப்படும் பிரவீன், சந்துரு, சூர்யா, நாகராஜ், சஞ்சய் ஆகிய 5 பேரை கைது செய்தனர். போலீஸ் விசாரணையில், கடந்த சில வாரங்களுக்கு முன்பு டிவியில் அதிக சத்தம் வைத்தது தொடர்பாக இரண்டு தப்பினருக்கும் இடையே மோதல் ஏற்பட்டுள்ளது.