புதுக்கோட்டை: யூக்கலிப்டஸ் காட்டில் என்கவுன்ட்டர் செய்யப்பட்ட ரௌடி – யார் இந்த துரை என்கிற துரைசாமி?

திருச்சி வண்ணாரப்பேட்டை, எம்.ஜி.ஆர் நகர் பகுதியைச் சேர்ந்தவர் பிரபல ரௌடி துரை (எ) துரைசாமி. இவரது பூர்வீகம் ராமநாதபுரம் என்றாலும், பல வருடங்களுக்கு முன்பே திருச்சிக்கு குடும்பத்தோடு வந்து தங்கியிருக்கிறார். ஆரம்பத்தில் சிறுசிறு திருட்டுத் தொழில்களில் ஈடுப்பட்டு வந்த இவர், அதன்பிறகு, வழிப்பறி, கொள்ளை, கஞ்சா விற்பனை, கொலை என பலவித சட்டவிரோத செயல்களில் ஈடுபடும் நபராக மாறினார். இதற்காக, வேறு யாரையும் கூட்டுச் சேர்த்துக்கொள்ளாத துரைசாமி, தனது தம்பி சோமு என்கிற சோமசுந்தரத்தை மட்டும் துணையாக வைத்துக் கொண்டு குற்றச் சம்பவங்களில் ஈடுபட்டு வந்தார்.

அதோடு, இவர் சார்ந்த சமூகத்தைச் சேர்ந்த ரௌடிகளுக்கு அடைக்கலம் கொடுத்தும் வந்திருக்கிறார். இவர்மீது 3 கொலை, கொள்ளை, வழிப்பறி வழக்குகள் என சுமார் 65 வழக்குகள் நிலுவையில் இருக்கின்றன. துரையின் சகோதரரான சோமு என்பவர் மீதும் கொலை வழக்குகள் உட்பட 20-க்கும் மேற்பட்ட வழக்குகள் நிலுவையில் இருக்கின்றன. இளவரசன் என்ற ரௌடியை சில வருடங்களுக்கு முன்பு வெட்டிக் கொலைசெய்தார் துரைசாமி. திருச்சி மட்டுமல்ல, சேலம், நாமக்கல், தஞ்சாவூர், கோவை, மதுரை, திண்டுக்கல், புதுக்கோட்டை, தேனி உள்ளிட்ட மாவட்டங்களில் துரைசாமிமீது வழக்குகள் நிலுவையில் உள்ளன. சோமு குண்டர் சட்டத்தில் சிறையில் அடைக்கப்பட்டுள்ளார்.

இந்த நிலையில், கடந்த வருடமே இவர்மீது இருந்த நகை கொள்ளை வழக்கு ஒன்றுக்காக துரைசாமியை, அவரது தம்பி சோமுவோடு சேர்த்து போலீஸார் கைதுசெய்தனர். அப்போது, தங்களை அரிவாளால் வெட்ட முயன்றதாக கூறி போலீஸார் துரைசாமி கால்மீது துப்பாப்பிச்சூடு நடத்தினர். அப்போதே அவரை என்கவுன்ட்டர் செய்ய முயன்றதாகவும், ஆனால் துரைசாமியை போலீஸார் கைதுசெய்து அழைத்துச் சென்ற சி.சி.டி.வி காட்சிகளை சமூக வலைதளங்களில் துரைசாமி உறவினர்கள் பரப்பியதால், என்கவுன்ட்டரில் இருந்து அப்போது தப்பியதாகவும் சொல்கிறார்கள். இதனால், போலீஸாரின் ஈகோவை தூண்டிய துரைசாமியை இப்போது போலீஸார் என்கவுன்ட்டர் செய்து பழி தீர்த்துள்ளதாக அவரது உறவினர்கள் சொல்கிறார்கள். இந்த நிலையில், துரைசாமியுடன் இருந்த அவரது சகோதரியின் மகன் பிரதீப்குமார் என்பவர் மாயமாகியுள்ளதாக, அவரது உறவினர்கள் குற்றம்சாட்டுகிறார்கள். திருச்சி பிரபல ரௌடி ஒருவர் என்கவுன்ட்டரில் சுட்டுக் கொல்லப்பட்டுள்ள சம்பவம், திருச்சி, புதுக்கோட்டை மாவட்டங்களில் பரபரப்பை ஏற்படுத்தியிருக்கிறது.

Junior Vikatan-ன் பிரத்யேக Whatsapp Group…

இணைவதற்கு இங்கே க்ளிக் செய்யவும்… https://tinyurl.com/2b963ppb

வணக்கம்,

BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://tinyurl.com/2b963ppb